ਜਲੰਧਰ -(ਮਨਦੀਪ ਕੌਰ )-ਮਕਸੂਦਾ ਦਾ ਫਲਾਈ ਓਵਰ ਤੇ ਟ੍ਰਿੱਪਲਿੰਗ ਰਾਈਡਿੰਗ ਕਰਕੇ ਜਾ ਰਹੇ ਵਿਦਿਆਰਥੀਆਂ ਦੇ ਨਾਲ ਇੱਕ ਭਿਆਨਕ ਹਾਦਸਾ ਵਾਪਰ ਗਿਆ। ਜਿਸ ਦੇ ਵਿੱਚ ਇੱਕ ਦੀ ਮੌਕੇ ਉੱਤੇ ਮੌਤ ਹੋ ਗਈ ਅਤੇ ਦੋ ਬੁਰੀ ਤਰ੍ਹਾਂ ਜ਼ਖਮੀ ਹੋ ਗਏ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਵਿਦਿਆਰਥੀ ਮਿਹਰ ਚੰਦ ਪੋਲੀਟੈਕਨਿਕਲ ਕਾਲਜ ਦੇ ਸਨ। ਇਹ ਹਾਦਸਾ ਕਰੇਨ ਨੂੰ ਓਵਰਟੇਕ ਕਰਦੇ ਸਮੇਂ ਵਾਪਰਿਆ। ਮ੍ਰਿਤਕ ਦੀ ਪਹਿਚਾਨ ਬਿੱਟੂ ਉਮਰ 17 ਸਾਲ ਪੁੱਤਰ ਰਣਜੀਤ ਭਾਰਤੀ ਨਿਵਾਸੀ ਫੋਕਲ ਪੁਆਇੰਟ ਦੇ ਰੂਪ ਵਿੱਚ ਹੋਈ ਹੈ । ਥਾਣਾ ਇਕ ਦੇ ਮੁਖੀ ਰਾਕੇਸ਼ ਕੁਮਾਰ ਨੇ ਦੱਸਿਆ ਕਿ ਬਿੱਟੂ, ਸੁਮਿਤ ਵਾਸੀ ਗਦਈਪੁਰ ਅਤੇ ਅਖਿਲ ਵਾਸੀ ਬਚਿੰਤ ਨਗਰ ਤਿੰਨੋਂ ਮੇਹਰ ਚੰਦ ਪੌਲੀਟੈਕਨਿਕਲ ਕਾਲਜ ਦੇ ਵਿਦਿਆਰਥੀ ਹਨ, ਜੋ ਦੇਰ ਸ਼ਾਮ ਸਕੂਲ ਤੋਂ ਬਾਅਦ ਇਕੋ ਐਕਟਿਵਾ ’ਤੇ ਆਪਣੇ ਘਰਾਂ ਵੱਲ ਜਾ ਰਹੇ ਸਨ।
ਉਨ੍ਹਾਂ ਕਿਹਾ ਕਿ ਜਾਂਚ ਵਿਚ ਸਾਹਮਣੇ ਆਇਆ ਹੈ ਕਿ ਜਿਵੇਂ ਹੀ ਉਹ ਮਕਸੂਦਾਂ ਫਲਾਈਓਵਰ ’ਤੇ ਪਹੁੰਚੇ, ਉਨ੍ਹਾਂ ਦੀ ਐਕਟਿਵਾ ਕਰੇਨ ਨੂੰ ਓਵਰਟੇਕ ਕਰਦੇ ਸਮੇਂ ਫਿਸਲ ਗਈ ਅਤੇ ਡਿਵਾਈਡਰ ਨਾਲ ਬੁਰੀ ਤਰ੍ਹਾਂ ਟਕਰਾ ਗਈ। ਇਸ ਦੌਰਾਨ ਬਿੱਟੂ ਬੇਹੋਸ਼ ਹੋ ਗਿਆ, ਜਦਕਿ ਸੁਮਿਤ ਅਤੇ ਅਖਿਲ ਜ਼ਖ਼ਮੀ ਹੋ ਗਏ। ਜਿਵੇਂ ਹੀ ਤਿੰਨਾਂ ਨੂੰ ਹਸਪਤਾਲ ਲਿਜਾਇਆ ਗਿਆ, ਡਾਕਟਰਾਂ ਨੇ ਬਿੱਟੂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਸੁਮਿਤ ਖ਼ਤਰੇ ਤੋਂ ਬਾਹਰ ਹੈ, ਜਦਕਿ ਅਖਿਲ ਦੇ ਹੱਥ ’ਤੇ ਸੱਟ ਲੱਗੀ ਹੈ। ਫਿਲਹਾਲ ਪੁਲਸ ਹੋਰ ਤੱਥਾਂ ਦੀ ਵੀ ਜਾਂਚ ਕਰ ਰਹੀ ਹੈ। ਪੁਲਸ ਨੇ ਮ੍ਰਿਤਕ ਨੌਜਵਾਨ ਦੀ ਲਾਸ਼ ਪੋਸਟਮਾਰਟਮ ਲਈ ਭੇਜ ਦਿੱਤੀ ਹੈ।
