ਜਲੰਧਰ -(ਮਨਦੀਪ ਕੌਰ )- ਐਕਸਾਈਜ ਵਿਭਾਗ ਵੱਲੋਂ ਨਿਯਮਾਂ ਅਨੁਸਾਰ ਸ਼ਰਾਬ ਵੇਚਣ ਅਤੇ ਦੇਰ ਰਾਤ ਤੱਕ ਬੀਅਰ ਬਾਰ ਖੁੱਲਾ ਰੱਖਣ ਨੂੰ ਲੈ ਕੇ ਵੱਡੀ ਕਾਰਵਾਈ ਨੂੰ ਅੰਜਾਮ ਦਿੱਤਾ ਗਿਆ ਹੈ। ਇਸੇ ਸਿਲਸਿਲੇ ਦੇ ਜਲੰਧਰ ਜੋਨ ਤਹਿਤ ਆਉਂਦੇ ਠੇਕਿਆਂ ਦੇ 2 ਗਰੁੱਪਾਂ ਨੂੰ ਅਗਲੇ ਦੋ ਦਿਨਾਂ ਲਈ ਸੀਲ ਕਰਨ ਦੇ ਹੁਕਮ ਜਾਰੀ ਕੀਤੇ ਗਏ ਹਨ । ਇਸੇ ਸਿਲਸਿਲੇ ਦੇ ਵਿੱਚ ਜੋਨ ਤਹਿਤ ਆਉਂਦੇ 4 ਬਾਰ ਦਾ ਲਾਈਸੈਂਸ ਇੱਕ ਮਹੀਨੇ ਲਈ ਸਸਪੈਂਡ ਕਰ ਦਿੱਤਾ ਗਿਆ ਹੈ । ਇਸ ਤੋਂ ਪਹਿਲਾਂ ਮਾਡਲ ਟਾਊਨ ਜਲੰਧਰ ਦੇ ਨੋਟੋਰੀਅਸ ਕਲੱਬ ਦਾ ਲਾਇਸੈਂਸ ਵੀ ਸਸਪੈਂਡ ਕਰਨ ਦੀ ਕਾਰਵਾਈ ਨੂੰ ਅੰਜਾਮ ਦਿੱਤਾ ਗਿਆ ਸੀ।
ਡੀ. ਸੀ. ਐਕਸਾਈਜ਼ (ਡੀ. ਈ. ਟੀ. ਸੀ.) ਐੱਸ. ਕੇ. ਗਰਗ ਵੱਲੋਂ ਜਾਰੀ ਹੁਕਮਾਂ ਮੁਤਾਬਕ ਰਾਮਾ ਮੰਡੀ ਗਰੁੱਪ ਤਹਿਤ ਆਉਂਦੇ 23 ਠੇਕੇ 24 ਅਤੇ 25 ਸਤੰਬਰ ਨੂੰ ਬੰਦ ਰਹਿਣਗੇ। ਇਸੇ ਤਰ੍ਹਾਂ ਨਾਲ ਹੁਸ਼ਿਆਰਪੁਰ ਰੋਡ ਦੇ ਹਰਿਆਣਾ ਗਰੁੱਪ ਦੇ 26 ਠੇਕੇ 24 ਤੋਂ 26 ਸਤੰਬਰ ਤਕ (3 ਦਿਨ) ਬੰਦ ਹੋਣਗੇ। ਗਰਗ ਵੱਲੋਂ ਜਲੰਧਰ ਜ਼ੋਨ ਤਹਿਤ ਆਉਂਦੇ ਅੰਮ੍ਰਿਤਸਰ ਇਲਾਕੇ ਦੇ 4 ਪੱਬ/ਬਾਰ ’ਤੇ ਕਾਰਵਾਈ ਕੀਤੀ ਗਈ ਹੈ। ਇਸੇ ਸਿਲਸਿਲੇ ਵਿਚ ਨਿਯਮਾਂ ਦੇ ਉਲਟ ਦੇਰ ਰਾਤ ਤਕ ਬਾਰ ਖੁੱਲ੍ਹਾ ਰੱਖਣ ਕਾਰਨ ਬਾਨ ਚੀਕ ਬਾਰ, ਐਲਗਿਨ ਕੈਫੇ ਬਾਰ, ਕਾਸਾ ਅਤੇ ਆਰਤੇਸਾ ਬਾਰ ਨੂੰ ਇਕ ਮਹੀਨੇ ਲਈ ਸਸਪੈਂਡ ਕੀਤਾ ਗਿਆ ਹੈ। ਦੂਜੇ ਪਾਸੇ ਹਰਿਆਣਾ ਵਿਚ ਵਿਕਰੀ ਵਾਲੀ ਬੀਅਰ ਮਿਲਣ ਕਾਰਨ ਬ੍ਰਯੂ ਡਰੱਗ ਬਾਰ ਦਾ ਲਾਇਸੈਂਸ ਇਕ ਮਹੀਨੇ ਲਈ ਸਸਪੈਂਡ ਕੀਤਾ ਗਿਆ ਹੈ।
ਅਧਿਕਾਰੀਆਂ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਰਾਮਾ ਮੰਡੀ ਗਰੁੱਪ ’ਤੇ ਦੋਸ਼ ਹੈ ਕਿ ਉਕਤ ਗਰੁੱਪ ਨੇ 27 ਪੇਟੀਆਂ ਸ਼ਰਾਬ ਵੇਚੀ ਸੀ, ਜੋ ਕਿ 16 ਸਤੰਬਰ ਨੂੰ ਅੰਮ੍ਰਿਤਸਰ ਵਿਚ ਫੜੀ ਗਈ ਸੀ। ਇਸੇ ਤਰ੍ਹਾਂ ਦੇ ਹਰਿਆਣਾ ਗਰੁੱਪ ਨੇ 81 ਪੇਟੀਆਂ ਵਿਚ ਸ਼ਰਾਬ ਵੇਚੀ ਸੀ, ਜੋ ਕਿ 10 ਸਤੰਬਰ ਨੂੰ ਪਠਾਨਕੋਟ ਵਿਚ ਫੜੀ ਗਈ। ਉਕਤ ਸ਼ਰਾਬ ਦੀ ਵਿਕਰੀ ਨੂੰ ਨਿਯਮਾਂ ਦੇ ਉਲਟ ਦੱਸਿਆ ਗਿਆ ਅਤੇ ਕਾਰਵਾਈ ਦੇ ਤੌਰ ’ਤੇ ਦੋਵਾਂ ਗਰੁੱਪਾਂ ਨੂੰ ਕ੍ਰਮਵਾਰ 2 ਅਤੇ 3 ਦਿਨਾਂ ਲਈ ਸੀਲ ਕੀਤਾ ਗਿਆ ਹੈ। ਵਰਣਨਯੋਗ ਹੈ ਕਿ ਡਿਪਟੀ ਕਮਿਸ਼ਨਰ ਐਕਸਾਈਜ਼ ਵੱਲੋਂ ਬੀਤੇ ਦਿਨੀਂ ਸਹਿਗਲ ਗਰੁੱਪ ਨੂੰ ਸ਼ਰਾਬ ਦੀ ਸਮੱਗਲਿੰਗ ਦੇ ਮਾਮਲੇ ਵਿਚ 5 ਲੱਖ ਰੁਪਏ ਜੁਰਮਾਨਾ ਠੋਕਿਆ ਗਿਆ ਸੀ। ਉਥੇ ਹੀ, ਇਸ ਸਬੰਧ ਵਿਚ ਗਰੁੱਪ ਦੇ ਸਾਰੇ ਠੇਕਿਆਂ ਨੂੰ ਇਕ ਦਿਨ ਲਈ ਬੰਦ ਵੀ ਕਰਵਾਇਆ ਗਿਆ ਸੀ।
