ਪੰਜਾਬ -(ਮਨਦੀਪ ਕੌਰ )– ਤਰਨ-ਤਾਰਨ ਦੇ ਵਿੱਚੋਂ ਇਸ ਸੋਮਵਾਰ ਸ਼ਾਮ ਨੂੰ ਕੈਰੋ ਪਿੰਡ ਵਿੱਚ ਰੇਲਵੇ ਕਰਾਸਿੰਗ ਨੇੜੇ ਗੈਂਗਵਾਰ ਹੋਈ। ਇਸ ਘਟਨਾ ਦੇ ਵਿੱਚ ਦੋ ਨੌਜਵਾਨ ਗੰਭੀਰ ਰੂਪ ਦੇ ਵਿੱਚ ਜਖਮੀ ਹੋ ਗਏ। ਜਦੋਂ ਕਿ ਇੱਕ ਹੋਰ ਨੌਜਵਾਨ ਦੀ ਇਲਾਜ ਦੌਰਾਨ ਮੌਤ ਹੋ ਗਈ। ਦੱਸਿਆ ਜਾ ਰਿਹਾ ਹੈ ਕਿ ਇਸ ਘਟਨਾ ਦੇ ਵਿੱਚ ਪੰਡੋਰੀ ਪਿੰਡ ਦੀ ਮਸ਼ਹੂਰ ਇੰਸਟਾਗਰਾਮ ਸਟਾਰ ਮਹਿਕ ਪੰਡੋਰੀ ਵੀ ਸ਼ਾਮਿਲ ਹੈ। ਕੁਝ ਸਮਾਂ ਪਹਿਲਾਂ ਮਹਿਕ ਪੰਡੋਰੀ ਨੇ ਜਸ ਧਾਲੀਵਾਲ ਨਾਮ ਦੇ ਇੱਕ ਨੌਜਵਾਨ ਦੀ ਵੀਡੀਓ ਸਾਂਝੀ ਕੀਤੀ ਸੀ। ਇਸ ਤੋਂ ਬਾਅਦ ਕੁਝ ਲੋਕ ਮਹਿਕ ਦੇ ਘਰ ਆਏ ਅਤੇ ਉਸਦੇ ਨਾਲ ਕੁੱਟਮਾਰ ਕੀਤੀ। ਜਿਸ ਨਾਲ ਕੁੱਟਮਾਰ ਦੀ ਵੀਡੀਓ ਸੋਸ਼ਲ ਮੀਡੀਆ ਉੱਤੇ ਸਾਂਝੀ ਵੀ ਕੀਤੀ ਗਈ।
ਸੋਮਵਾਰ ਨੂੰ ਇਹ ਘਟਨਾ ਦੋਹਾਂ ਧਿਰਾਂ ਦੇ ਵਿੱਚ ਗਰਮਾ ਗਰਮੀ ਬਹਿਸ ਤੱਕ ਵੱਧ ਗਈ। ਸ਼ਾਮ ਨੂੰ ਪੱਟੀ ਕਸਬੇ ਨੇੜੇ ਕੈਰੋ ਕਰਾਸਿੰਗ ਲਾਈਨ ਦੇ ਨੇੜੇ ਦੋਹਾਂ ਧਿਰਾਂ ਦੇ ਹਥਿਆਰਬੰਦ ਲੋਕ ਇਕੱਠੇ ਹੋਏ। ਇਸ ਲੜਾਈ ਦੇ ਵਿੱਚ ਲਗਭਗ ਅੱਠ ਗੋਲੀਆਂ ਫਾਇਰ ਕੀਤੀਆਂ ਗਈਆਂ । ਇਸ ਘਟਨਾ ਦੇ ਵਿੱਚ ਫਾਰਚੂਨਰ ਸਵਾਰ ਦੋ ਨੌਜਵਾਨ ਜਖਮੀ ਹੋ ਗਏ। ਘਟਨਾ ਤੋਂ ਬਾਅਦ ਦੋਵਾਂ ਜਖਮੀਆਂ ਨੂੰ ਤਰਨ ਤਾਰਨ ਦੇ ਇੱਕ ਨਿੱਜੀ ਹਸਪਤਾਲ ਦੇ ਵਿੱਚ ਦਾਖਿਲ ਕਰਵਾਇਆ ਗਿਆ ।ਕਰਮੂ ਵਾਲਾ ਪਿੰਡ ਦੇ ਰਹਿਣ ਵਾਲੇ ਸਮਰਪ੍ਰੀਤ ਸਿੰਘ ਦੀ ਇਲਾਜ ਦੌਰਾਨ ਮੌਤ ਹੋ ਗਈ। ਮਰਹਾਨਾ ਪਿੰਡ ਦੇ ਰਹਿਣ ਵਾਲੇ ਸੌਰ ਸਿੰਘ ਦੀ ਹਾਲਤ ਪਹਿਲਾਂ ਗੰਭੀਰ ਬਣੀ ਹੋਈ ਸੀ ਹੁਣ ਤਾਜ਼ਾ ਰਿਪੋਰਟ ਮੁਤਾਬਕ ਉਸਦੀ ਵੀ ਮੌਤ ਹੋ ਗਈ ਹੈ ਪੁਸ਼ਟੀ ਹੋਣੀ ਹਜੇ ਬਾਕੀ ਹੈ।
ਹਮਲੇ ਤੋਂ ਬਾਅਦ ਹਮਲਾਵਰ ਆਪਣੀ ਗੱਡੀ ਵਿੱਚ ਬੈਠ ਕੇ ਪੱਟੀ ਵੱਲ ਭੱਜ ਗਏ ਘਟਨਾ ਦੀ ਜਾਣਕਾਰੀ ਮਿਲਦੇ ਹੀ ਪੁਲਿਸ ਸੁਪਰੀਡੈਂਟ ਰਿਪੁਤਪਨ ਸਿੰਘ, ਡੀਐਸਪੀ ਲਵਕੇਸ਼ ਸੈਨੀ, ਪੱਟੀ ਪੁਲਿਸ ਸਟੇਸ਼ਨ ਮੁਖੀ ਕਵਲਜੀਤ ਰਾਏ, ਸਿਟੀ ਪੁਲਿਸ ਸਟੇਸ਼ਨ ਮੁਖੀ ਗੁਰਚਰਨ ਸਿੰਘ, ਸਦਰ ਪੁਲਿਸ ਸਟੇਸ਼ਨ ਮੁਖੀ ਅਵਤਾਰ ਸਿੰਘ ਸੰਧੂ ਅਤੇ ਚੀਫ ਆਫ ਸਟਾਫ ਪ੍ਰਭਜੀਤ ਸਿੰਘ ਮੌਕੇ ਤੇ ਪਹੁੰਚੇ। ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ।ਅਧਿਕਾਰੀ ਇਸ ਸਮੇਂ ਘਟਨਾ ਸਬੰਧੀ ਕੋਈ ਜਾਣਕਾਰੀ ਸਾਂਝੀ ਨਹੀਂ ਕਰ ਰਹੇ ਹਨ।
